ИРОН БÆГÆНЫ-2019

Кæд рæстæг ивы æмæ цард размæ тындзы, уæддæр ирон æгъдау æмæ традицитæ рох кæнын нæ хъæуы. Уымæн æмæ нæ фыдæлтæ сæ алы хъуыддаг, сæ алы хъуыды æмæ къахдзæф дæр æгъдаумæ гæсгæ кодтой æмæ нын хæзнайау кæй ныууагътой, уыцы æгъдæуттæ фæлтæрæй-фæлтæрмæ рæсугъдæй хæццæ кæнын махæн нæ хæс у.
Ирон адæмæн сæ фынгæвæрдты бæгæны кæддæриддæр уæлдай бынат ахста. Бæганы куы равзæрд, уæдæй нырмæ Стыр Хуыцау æмæ Йе сконд зæдтæм кувæм ацы нæртон нозтæй.
Нæ республикæ æрвылаз бæрæг кæны Ирон бæгæныйы бæрæгбон. Уый сырæзыди нæ культурæйы министрад æмæ бæгæныфыцæн кампани «Баварийы» хъæппæрисæй.
Ацы хъуыддаджы нæ районы цæрджытæ дæр фæсте нæ зайынц, æмæ та мæнæ ныр дæр, ивгъуыд дыццæджы, нæ культурæйы галуанмæ æрбамбырд сты нæ «сатанатæ», сæ иуæй-иннæ аивдæрæй сыр-сыргæнгæ бæгæны æмæ бæркадджын хуынтимæ.
Сæ размæ сын, ирон æгъдаумæ гæсгæ, рахастой æртæ уæливыхы, æртæ фæрсчы æмæ бæгæныйы къус.
Бæгæныйы къус йæ къухтæм райсгæйæ районы Ныхасы сæрдар Томайты Савели арфæ ракодта, ацы рæсугъд бæрæгбон чи æрхъуыды кодта, уыдонæн, стæй конкурсы архайджытæн. Уæлдæфы айзæлыд «Лæгты Дзуары зарæг»…
Мадзал амонæг Гаглойты Альбинæ фысымты номæй «æгасцуай» загъта кадджын уазджытæн. Уыдон та уыдысты: бæрæгбоны проекты автор, Цæгат Ирыстоны культурæйы сгуыхт кусæг Битарты Ларисæ, бæгæныфыцæн кампани «Баварийы» цехы сæргълæууæг Ортабайты Зæлинæ, маркетинг æмæ рекламæйы хайады сæргълæууæг Бытъæты Ирбег æмæ «Баварийы» пресс-центры сæргълæууæг Æгкацаты Верæ.
Мадзалы сæйраг архайджытæ та уыдысты бæгæныфыцджытæ: Муриты Тамарæ (Беслæныхъæу), Колыты Зитæ (Олгинскæ), Тедтаты Лилия (Брут), Хъазиты Маринæ (Ног Бæтæхъойыхъæу), Мæргъиты Мананæ (Цæлыкк), Æгайты Заремæ (Заманхъул), Хадыхъаты Лидæ (Фарн), Цъыккаты Янæ (Бæтæхъо), Гайты Зæлинæ (Зилгæ), Дыдарты Альбинæ (Хуымæллæг), Уаниты Арианæ (Раздзог). Тынг æхсызгонæн бафиппаинаг у, се ‘хсæн кæй уыд хæрз æрыгон чызджытæ æмæ чындзытæ.
Райдайæн 1 фарсыл
Куыд æдзух, афтæ та ацы хатт дæр Галуаны хихъхъæппæрисадон къордты архайджытæ бæрæгбондзауты зæрдæтæ барухс кодтой сæ зард æмæ кафтæй.
Цалынмæ концерт йæ тæккæ цыреныл уыд, уæдмæ жюрийы уæнгтæ та нæ «сатанаты» ‘хсæн æвзæрстой дæсныдæр бæгæныфыцæджы.
Уалынмæ сын сæ бæрæггæнæнтæ бахынцтой, æмæ рабæрæг сты фæуæлахизуæвджытæ, кæцыты нæмттæ æхсызгонæн бакаст Томайты Савели.
Фыццаг бынат бацахста Дыдарты Альбинæ Хуымæллæгæй, дыккаг - Хъазиты Маринæ Ног Бæтæхъойыхъæуæй, æртыккаг бынатмæ рацыд Колыты Зитæ Олгинскæйæ.
Конкурсы архайджытæн се ‘ппæтæн дæр лæвæрд æрцыд æвдисæндар гæххæттытæ æмæ зæрдылдарæн лæвæрттæ, фæуæлахизуæвджытæн та ма чысыл æхцайы фæрæзтæ.
Мадзал бацæттæ кодта Ходы Ларисæ. Цæмæй бæрæгбон рæсугъд æмвæзадыл ацæуа, уый тыххæй йæ фарсмæ æрбалæууыдысты Туаты Риммæ, Дзæрæгъæсты Алинæ æмæ Адырхаты Ирæ.
Сæ цæрæнбон бирæ æмæ сыл рæсугъд бæрæгбæттæ цæуæд! Ацы ерыстæм йæ ныфс чи бахаста, уыдонæн та фылдæрæй-фылдæр кæнæд сæ къухты бæркад!

"ВЕСТНИК БЕСЛАНА"