Ирон футболы патриарх Цæлыккаты Муссæйыл абон сæххæст уыдаид 85 азы

Абон ирон футболы патриарх Цæлыккаты Муссæйыл сæххæст уыдаид 85 азы. Ацы диссаджы тренер бахаста егъау æвæрæн бынæттон «Спартак»-ы фыццаг триумфмæ.

Цæлыккаты Муссæ хъазæджы карьерæ йæ тыхы уæвгæйæ ахицæн кодта. Æмбаладон матчы кæй райста, уыцы травмæйы аххосæй футболист хъазæджы хуызы спортивон бæрзæндтæм нал схызт. Зынтæн быхсгæйæ, Цæлыккаты Муссæ 1963 азы райдыдта кусын фæсивæдимæ, амынд фæсивæды фылдæр уыдысты йе ‘мгар. Фæстæдæр æрыгон дæсныйы æрбахуыдтой «Спартак»-мæ. Уый сразы ис. Йемæ ахуыдта суинаг хъазджыты ахадгæ нымæц. Куыд рабæрæг, афтæмæй 15 азы дæргъы ирон футбол уыдоныл æнцой кодта.

1967 азы Цæлыккаты Муссæ республикæйы сæйраг командæйы фæрсæй фæрстæм кусын райдыдта æмбисонды дæсны Зазроты Андреимæ. Йæ фыццаг æххæст сезон «Спартак» тынг æнтыстджынæй арвыста: райтынг сты ахæм футболисттæ, куыд Хуыдиаты Николай, Мырыкъаты Хасан æмæ Владимир Подлужный, диссаджы хъазт кодтой фæлтæрдджын хъазджытæ Нодар Папелашвили, Георгий Кайшаури, Борис Конфедерат, Бичегкуты Игорь, Плиты Альберт. Куыд зонæм, афтæмæй 1969 азы ацы фæсивæды къухы бафтыд æвæджиауы æнтыстытæ, элитæмæ фæндаг айгæрстой. Уыимæ, 70-æм азты райдианы командæйы уавæр фæзын. Тренерты систематикон гæлæмытæ клубы райрæзт къуылымпы кодтой. Атахты зонæйы уæвгæйæ, фарсхæцджыты азарæй тæрсгæйæ, разамонджытæ æххуысмæ здæхтысты æппæтхъом Цæлыккаты Муссæмæ, уый-иу коллектив кадимæ аирвæзын кодта. Фæлæ командæимæ кусыны фадат курдиатджын дæсныйæн цæмæндæр нæ лæвæрдтой. Æцæг уый нæ бахъыгдардта креативон æмæ амбициозон тренеры ирон футболы историйы йæ ном стыр дамгъæтæй ныффыссыны хъуыддаджы. Цæлыккаты Муссæйы бирæазон куысты ахадындзинадыл дзурæг сты йæ хъомылгæнинæгты нæмттæ. Уыдоны ‘хсæн сты Хуыдиаты Николай, Владимир Олейник, Суанты Руслан, Хуадонты Георгий, Александр Бабенко, Гиви Керашвили æмæ æнд.

Цæлыккаты Муссæ йæ цардæй ахицæн 2020 азы сентябры. Йæ фæстаг интервьютæй иуы, ирон футболы фидæнимæ баст фарстыл дзургæйæ, уый загъта:

«Махмæ футбол ис æмæ уыдзæн! Ис ахæм зайæгой – куыдзы дæндаг, уый асфальты бынæй дæр рæзы. Раст афтæ нæ футбол дæр. Къæхты бын дæр æй куы фæкæной, асфальты бын дæр æй куы фæкæной, уæддæр нæ фесæфдзæн. Республикæйы, футбол сæфын чи нæ бауадза, ахæм адæм ис».